जीवनशैलीतील इतर नियम पाळताना मला फारशी अडचण आली नाही. मला चालायला आवडते. तसेच मला सॅलड आणि मोड आलेली कडधान्ये आवडतात, त्यामुळे हे माझ्यासाठी तुलनेने सोपे होते. मी पोळी/भाकरीचे प्रमाण कमी करून त्याऐवजी सॅलड, टोफू, मोड आलेली कडधान्ये इत्यादींचा समावेश केला.
ही जीवनशैली पाळण्यासाठी आपला निर्धार हा सर्वांत महत्त्वाचा आहे.
पहिले तीन महिने मी कोणतीही तडजोड न करता ही जीवनशैली अतिशय काटेकोरपणे पाळली. त्यानंतर महिन्यातून एक-दोन वेळा थोडा अपवाद झाला; मात्र एकूणात मी जीवनशैली चांगल्या प्रकारे पाळली.
आता मी मधुमेहातून प्री-डायबेटिक अवस्थेत आलो आहे आणि लवकरच पूर्णपणे नॉन-डायबेटिक होईन, अशी मला आशा आहे. सध्या मी मधुमेहाची एकही गोळी घेत नाही. त्यासोबत वजन कमी होणे हा अतिरिक्त फायदा झाला आहे. आता मी ही जीवनशैली आयुष्यभर पाळण्याचा निर्णय घेतला आहे.
मधुमेहावर नियंत्रण मिळवून तो पूर्ववत करण्यास मदत करणारी आणि मोफत उपलब्ध असलेली अशी उत्कृष्ट आहारपद्धती दिल्याबद्दल मी डॉ. दीक्षित सरांचा मनापासून आभारी आहे. समाजासाठी डॉ. दीक्षित सरांचे योगदान अतिशय उल्लेखनीय आहे आणि त्यांच्याबद्दल माझ्या मनात खूप आदर आहे.
श्री. भास्कर भट्टाचार्य यांनी मला ही जीवनशैली पाळण्यासाठी प्रोत्साहन दिले. त्यांचे मौल्यवान मार्गदर्शन आणि सहकार्य मला खूप उपयोगी ठरले. माझ्या पत्नीनेही मला ही आहारशैली पाळण्यासाठी प्रोत्साहन दिले. तिच्या सहकार्याशिवाय हे यश शक्य झाले नसते.

(मराठी अनुवाद: डॉ. रत्नाकर गोरे)