निवृत्तीनंतर माझे वजन जवळपास सात किलोने वाढले होते. ६४ किलोच्या आसपास असणारे वजन ७१ किलोपर्यंत झाले होते, त्यामुळे चालताना गुडघेदुखीचा त्रास जाणवत होता. उठताना व बसताना गुडघे दुखत होते. माझ्या पत्नीने सर्वप्रथम २०२३ साली ९० दिवसांच्या वेट लॉस व मधुमेह रिवर्सल आव्हानांमध्ये भाग घेतला होता, तेव्हापासून मला डॉक्टर दीक्षित लाईफ स्टाईल बद्दल माहिती होती.
हे चॅलेंज एक जूनपासून सुरू होणार आहे हे समजल्यानंतर मी ठरवले की आपणही या चॅलेंजमध्ये सहभागी व्हायचे. माझ्या पत्नीने पाचव्या आणि सहाव्या चॅलेंजमध्ये सहभाग घेतला असल्यामुळे मला या जीवनशैलीबद्दल आकर्षण वाटत होते आणि त्याचे फायदे देखील समजले होते. माझ्या पत्नीने प्रयत्नपूर्वक तिचे वजन कमी केले होते, त्यामुळे मला सुद्धा हे शक्य आहे असे वाटू लागले.
मी नियमितपणे चालणे सुरू केले. आमच्या ग्रुप ॲडमिनने केलेल्या मार्गदर्शनानुसार पूर्ण शिस्त पाळली. जेवणाचे फोटो नियमितपणे शेअर केले. दररोज कमीत कमी पाच किलोमीटर व जास्तीत जास्त सात किलोमीटर चालणे चालू ठेवले. दररोज न चुकता चालण्याचा आग्रह माझी पत्नी धरत होती, त्यामुळे पहिल्या महिन्याच्या शेवटी माझे वजन दोन किलोने कमी झाले. दुसऱ्या महिन्याच्या शेवटी वजन आणखी दोन किलोने कमी झाले.