चुकीच्या आहार विहारामुळे माझं वजन कमीच होतं नव्हतं . वर्षभरात येणारे सणवार आणि समारंभ हे त्यात भरीला. मला डॉ. दीक्षित जीवनशैली आणि ९० दिवसांचे चॅलेंज या बद्दल यूट्यूब वर माहिती मिळाली. नेमकी त्याच वेळेला मी ऑस्ट्रेलियात मुलीकडे एक वर्षासाठी राहायला आले. श्री श्रीकांत डंके सरांशी संपर्क साधून मी नोंदणी करून घेतली. नियमबाह्य जाऊन तसें काहीच करायचे नव्हते. रोजचेच पण शिस्तबद्ध जेवण आणि तेही दिवसातून दोनदा. घरात मुलीला सांगून तिलाही नोंदणी करायला लावले. माझ्या यजमानांची थाळी बघून तर आम्हाला हेवाच वाटायचा कारण हिरव्या पालेभाज्यांची कमी आम्हाला इथे ऑस्ट्रेलियात जाणवत होती. शिवाय कडधान्याला मोड येतं नव्हते. अजूनही दिवसाचे तापमान १२° आहे. पायांची बोटे थंडीने काळी ठीक्कर पडली. मग काय बाहेर जाणं बंद झालं, घरातच व्यायाम करायला लागले. जागच्या जागी ब्रिस्क वॉक करत होते. शाळेत शिकवलेले ड्रिल व्यायाम घरात करत होते. एवढे मात्र पक्के गाठीशी बांधले होते कीं काहीही होवो दोनदा जेवणाखेरीज तोंड हलवायचे नाही.