मला सांगताना खूप आनंद होत आहे की डॉ दीक्षित जीवनशैलीमुळे किती मोठा बदल होऊ शकतो याचे मी एक ज्वलंत उदाहरण आहे.
फेब्रुवारी २०२५ मध्ये माझ्या घशाच्या ऑपरेशनसाठी फिटनेस सर्टिफिकेट आवश्यक होते. त्या वेळी पॅथॉलॉजी रिपोर्टमध्ये अनपेक्षितपणे मला मधुमेह असल्याचे निदान झाले. माझी सरासरी शुगर २२३ होती आणि एचबीएवनसी ९.४% होता. यापूर्वी मला कोणतेही लक्षण जाणवले नव्हते, त्यामुळे ही बाब माझ्यासाठी धक्का होती.
डॉक्टरांनी औषधे सुरू केली, पण मी मनोमन ठरवलं की फक्त फिटनेस रिपोर्ट व्यवस्थित येईपर्यंतच औषधे घ्यायची. ऑपरेशन व्यवस्थित झाल्यावर मी औषधे बंद केली आणि त्याच काळात मला माझ्या मित्रांकडून डॉ. जगन्नाथ दीक्षित सरांच्या दोन वेळा जेवणाच्या संकल्पनेविषयी माहिती मिळाली.
मी यूट्यूबवर सरांचे अनेक व्हिडिओ पाहिले, चॅनेल सबस्क्राईब केले आणि कुठल्याही ग्रुपमध्ये न सामील होता स्वतःहून त्यांची जीवनशैली तंतोतंत पाळायला सुरुवात केली. केवळ तीन महिन्यांत माझ्या रिपोर्टमध्ये मोठा फरक दिसू लागला — एचबीएवनसी ९.४ वरून ६.९% वर आला, वजन ७२ किलोवरून ६८.२ किलोपर्यंत कमी झाले.