मी एम पी एस सी ची तयारी करत होतो. फेब्रुवारी २०२१ मध्ये माझे वजन जे आधी ६७ किलो होते ते अचानक कमी होऊन ६२ वर आले आणि माझी तब्बेत खालावली . मी चेकअप केलं तर माझी शुगर ३४० झाली होती. मला धक्काच बसला, कारण मी त्या अगोदर कधीही अशी टेस्ट केली नव्हती. मग काय, डॉक्टर साहेबानी सकाळी एक आणि संध्याकाळी एक अशी गोळी सरु केली आणि सोबत हे ही सांगितले की ही गोळी तुम्हाला आयुष्यभर घ्यावी लागेल. तेव्हा मी खूप टेन्शन मध्ये होतो. पण मनाला वाटत होतं की यावर काहीतरी उपाय असेल म्हणून मी यूट्यूब आणि गूगल च्या माध्यमातून यावर वर काही उपाय आहे का ते पाहत होतो.

मग मला *डॉ दीक्षित* सरांचा चा विडिओ पाहायला मिळाला आणि तसेच मी गूगल वर सरांचे चे पेपर पण वाचले. माझा थोडा आत्मविश्वास वाढला. मी डॉ. नंदकुमार हाडगेकर यांना कॉल केला त्यांनी मला एचबीएवनसी आणि उपाशीपोटी इन्सुलिन ह्या चाचण्या करायला सांगितल्या. माझे एचबीएवनसी १०.९ आणि उपाशीपोटी इन्सुलिन ३.६ होते. हे पाहून सरांनी मला काही अजून टेस्ट करायला सांगितल्या. मग मी सी पेप्टाइड केली तर ते ०.६६४ म्हणजे खूप कमी होते. मग मला सरांनी एक महिना ही जीवनशैली करून पाहा असं सांगितलं.